» » » » أبو حيون المجنزرة البشرية

كان في فندق  من تلات طوابق بنادي الجيش عايشين فيه كل الرياضيين ،بالطابق الاول كانو لعيبة اليد بالتاني كانو السله والطائره ونحنا لعيبة القدم كنا بالطابق التالت،أول غرفه كان نايم فيها العمير وباسل علي والغرفه يلي بعدا كنت انا وزياد طريفي ومواجهنا كان رغدان وجومرد واحمد حريري بعد غرفتنا كان البرنس محمد بيروتي لحالو بالغرفه هوي ومكنة الاكسبريسو والكابتشينو الخاصه فيه، ومواجهو كان مصعب محمد ونهاد حاج مصطفى ويوسف ربيع حسن.
عشنا ايام حلوة كتير كنا اكتر من أخوه بس كانت تصير اشكالات بسيطه بيناتنا تنحل فورا وكان مرجعية حل أي خلاف بين أي تنين هوي مصعب محمد كبيرنا والكل كان يحترمو يعني قديش كنت شايف حالي انا وقديش كنت جقر بس قدام مصعب ماكنت استرجي ارفع راسي هالزلمه بيفرض على أي شخص بالعالم أحترامو.
كل حدا فينا كان ألو خصوصيه معينه مثلا رغدان شحادة كنا نسميه الزعيم لأن كيف ماكان يمشي او يتحرك نشوف في اربعه عالقليله لاحقينو بيحبوه كتير شي رفقات من خارج النادي شي لعيبة يد من النادي ومن بين هالشباب يلي كانو ورا رغدان شب من الرقه حارس اليد بالنادي لهلق مابعرف شو أسمو الحقيقي بس كانو ينادولو (أبو حيون)
وابو حيوان يا مرحومين البي طولو متر و٩٠ سم ووزنو ١١٠ كيلو يعني بدك تقول وحش حقيقي،أول ماوصلت عالشام حضرتلو مشكله مع شب بشارع العابد يالطيف يا جماعه شو عمل فيه مو بس قتلو أكلو أكل يعني يسلخو كف يقلبو بالأرض يشيلو من الأرض ويرجع يسلخو كف تاني وهداك خطيتو ينام عالارض ويعمل حالو انو مات حتى يحل عنو ابو حيون بس عبث الله مابيقنعو بدو يموتو حتى اجاه الأمر من الزعيم رغدان وقلو بلهجتو الديريه الحلوه(تركو ياوال) تركو ابو حيون لان كان يعبدو لرغدان يعني  الله بالسما ورغدان عالأرض، وصار ابو حيون رعب بالنسبه ألي كل ماشوفو أهرب من طريقو وقول يا اخي مابتعرف شو ممكن يطلع بعقلو وقت أضطر امرق من جنبو قبل ماوصل لعندو  كون عمقلو أحلى ابو حيون أحسن حارس بسوريا يضحك وتمرق القصه على خير.
لمرة من المرات خلصنا تمرين وطلعت عالغرفه اتدوشت وقاعد عمأرتاح بيدخل الطريفي معصب بيقلي اتقاتلت مع رغدان بالتمرين ورايح هلق اطحش عليه  عغرفتو يا انا يا هوي بهالنادي هون أنا نشف الدم بعروقي رغدان يعني ابو حيون و أبو حيون يعني وحش.
قلتلو لزياد يرحم أبوك بلاها وهدي حالك هالفوته صعبه عليك ابو حيون ايدو متل المجرفه والله بيفصفصك بعدين يمكن يتذكر رغدان انو بالتمرين ماخليتو يشوط الجزاء يجي يبعتو لابو حيون عليي بالسيرة يطرقني كفين،،
قلي  ويكون وراه مين ماكان بلا ابو حيون بلا بطيخ (الطريفي ماكان بيعرفو شخصي منيح لأبو حيون وماكان حضرانو بمشكلتو مع الشب بشارع العابد) لا مارح اسكتلو، قلتلو ليك اذا بسمع صواتك برا مارح اطلع خلصك بدي اضربك وآجر مع ابو حيون خلص كبر عقلك رغدان طيب وهلق رح قلو لمصعب منشان تتصالحو.
رحت عند مصعب شرحتلو ملابسات القضيه واتدخل مصعب وانحلت القصه ونحنا قاعدين عند رغدان عمنشرب شاي بيدخل ابو حيون متل الوحش اتسطح عالارض شكلو متل المارد، نكشتو للطريفي قلتلو شايف هالمجنزرة البشريه قلي اي مين هاد قلتلو هاد هوي ابو حيون قلي يالطيف الله سترني ما تورطت معو.
كانت أيام حلوه كتير نشا الله ايامكون كلا خير يا اخواتي وتحية لأبو حيون بغيابو..
الحلقه الجاي رح نحكي عن أحلى وأهضم وأطيب شب بيمر على نادي الجيش بس كمان مارح قلكن مين هوي.

زياد شعبو

عن المدون Mustafa Hamido

مدون و محرر من فريق الموقع
»
السابق
Older Post
«
التالي
Newer Post

No comments :

ترك الرد