» » » » » » أنا الهداف... و المدرب راسو يابس

كانت الدنيا شتوية وعنا تمرين صباحي الساعة ٧  وملعب التمرين برا مغطى بالتلج ، يعني أنك تقنع حدا فهمان بكرة القدم بأنو نحنا عنا دوري محترفين أسهلك من انك تفيقني بهالجو البارد حتى انزل عالتمرين.
المهم فتحت عيوني شوي وصارو تنين يتقاتلو براسي واحد يقلي: قوم قوم غسل وجهك بتتنشط ولبوس تيابك ونزول عالتمرين
والتاني يقلي :ولك مجنون انت خليك نايم ليك الدنيا برا تلج بعدين ماحدا رح يعاتبك او يحكي معك او يزعلك مو انت هداف الفريق.
وبعد تفكير ٥ دقايق قررت أسمع كلام الأخ التاني ورجعت نمت .
والله يا ولاد الحلال بعد شي ساعتين بفيق متل المجنون على حدا عميخبط عالباب انا قلت هجمو اليهود علينا او صار اعصار او زلزال ركضت فتحت الباب واذ المدرب الروماني كوستيكا مدربنا بنادي الجيش قلي: ليك ولا هلق هلق بتضب غراضك وبتروح عالبيت مين مفكر حالك رفقاتك اتمرنو و حضرتك نايم انت مابتلزمني بالفريق ودار ضهرو ومشي،لعما صفنت شوي والله عميحكي جد لحقتو مستر معلم حبيب الله يوفقك والله كنت تعبان رجلي عمتوجعني
قلي :شرف
قلتلو :يلا معك انا
قلي: شرف انقلع من هون
ماكنت روح ضليت لاحقو اترجى فيه لان كان معروف عنو راسو يابس وماعندو كبير،اخر شي دار وجهو عليي ومسكني من صدري
وقلي: مستعد اخسر بطولة دوري وبطولة كأس ومستعد هلق قدم استقالتي بس مابخلي لاعب أكبر من الفريق مين ماكان يكون النظام والانضباط سبب نجاح اي عمل ممكن تقوم فيه واذا سمحت لحدا يشتغل بشكل فردي وعلى كيفو بتكون حكمت على حالك وعلى فريقك بالفشل هالمرة سماح بس اذا بيتكرر هالشي بتعتبر حالك برا الفريق من دون اي نقاش.
ومن يومتا ياحبيب التمرين ٧ الصبح تلاقيني ٦ ونص عمنطط الطابه بالملعب يجي العينتين يتطلع عليي ويضحك.
خلص الموسم أخدنا كاس جمهوريه واخدنا اول نسخه من كأس الاتحاد الأسيوي و كنت هداف البطوله الاسيويه
السلام لروحك سيدي الرائع كوستيكا
زياد شعبو

عن المدون Mustafa Hamido

مدون و محرر من فريق الموقع
»
السابق
Older Post
«
التالي
Newer Post

No comments :

ترك الرد